يا شعب العراق اشبيك سوده امصخمه أيامك
يا شعب أشوكت ترتاح من دون الأعوام امگدرة أعوامك
يل حزنك حزن عاشور من عاشور تطلع تلگه بس عاشورگدامك
ليه تذبح أخيك على يامال عل ورقة السخيفة اتفخخ أحزامك
ليه تذبح إستادك علمك حرفين وك هاذا قدوتك ومعلي أمقامك
ليه تذبح طبيبك من يرد للسوگ خله يداوي جرحك لچمته ابهامك
ليه تذبح التاجر من يرد للبيت خله أيفطرك يا مدمن أصيامك
ليه يتمت الأطفال ونته أبو الأيتام متكسر الخاطر دمعت أيتامك
ليه أتفجر زوار الحسين للكربلاه يمشون مو ذوله اهلك ورحم أرحامك
ليه تزعل أذا واحد يگلگ أنه أحب حسين هاذا وديعة فاطمة يلتفهم أسلامك
ليه تذبح الشيعي الأحب علي الكرار مو گبل ميكون أمامه المرتضى أيمامك
وليه تذبح السني أتحسبه من صدام مو صدام كان و كان صدامك
وليه أتفجر جامع وحسينيه وكنيسة انبنت الله وعلى كل المناير صعدن الاغامك
وليه وآلاف ليه وعجزيت ال ليه ياشعبي شجاك منكس أعلامك
انه ادري بي عليك اختلفن الرايات وبس راية محمد شاد صمصامك
تاريخك گبل ما يولد التاريخ أدم من نزل خطار بخيامك
ونبي ابراهيم هاذا السومري من اور خاف يزايدك واحد على أعلامك
وليه وليه والاف ليه ليه وعجزيت ال ليه ياشعبي شجاك منكس أعلامك
موضوع: شعر على العراق الجريح 
السبت أبريل 05, 2008 6:57 am
